Alla Itolae Nusa 20
Eleki Abrahame ikeu bei Mamre eni otoi mere lopai tape Negepe, me Kadese kai Sure esi tlelare. Eleki ikeu rue me Gerare, Abrahame tamata maka luake beluke kena kota mere.
Kena irue ete mere ibeteke be Sarare betai eleki Abimeleke, kamale Gerare iulake tamata kena keri Sara lokoi.
Eleki kena kpetu rebai sae me Abimeleke ikmani kena Alla Ibeteke lokoi be, “Amata neka, le arana bina rebe ikai peneka.”
Po Abimeleke intulu kai Sara mosa hoko ibeteke loko Tuhane be, “Tuhane, au ono sala mo! Hoko Aatia au kai pusue auku nusa toine neko?
Abrahame ruai eri beteke be bina mere betai kai binare ruai eri beteke ele mere lekwe. Au ono ele mere kena lale misete hoko auku sala mo.”
Eleki Alla Ibeteke kena kmani mere be, “Tinai, Au rekwa be aono mere kena lale misete, hoko Au lake ale leke aono dosa ete Au yake kai Au sebeiye ale mo kena ntulu kai bina mere.
Hoko kena meije aleuke bina mere loko eni mokwai. Eni mokwaije nabi hoko kotie le ale leke amata yake. Po sepo aleukeni mo hoko anete, ale kai amu nusa toine imi mata pusumi.”
Eleki ele bobanu beleite ikoti pusue eni tamata elakaru kai ialenake eni kmanire etesi hoko pususi rilasi titinai.
Eleki Abimeleke ikoti Abrahame kai Itneui be, “Aono saisa ete ami meije? Auku sala saisa ete ale eti aono susate elake meije ete au kai auku nusa toine? Aono ele mere ete au, mere mise mo.
Le mula pine aono ele mere?”
Eleki Abrahame iralakeni be, “Au betinake ete meije sae irilai le Alla mo, hoko tinake lalesi loko auku bina eleki esi bunuku.
Kai tinai, ile betaku. Amiki ama esa po ami lara ina eleki ami kai lomai.
Eleki kena Alla Iulake au siri bei auku lumare, keu bei kota kena kota, aure tamata beluke kena kota meru. Hoko au beteke loko auku bina be, ‘Lalemu noa au hoko abeteke ete sie be ale betaku.’”
Eleki Abimeleke ileuke Sara ete Abrahame kai iriluke tamata makerika kai domba kai sape ete Abrahame.
Eleki Abimeleke ibeteke loko Abrahame be, “Auku tapele meije sebeiye alilake otoi sae kena arue kena neka.”
Eleki Abimeleke ibeteke loko Sara be, “Au riluke kepe perake matai usate esa ete betamu peneka. Mere leke tanda ete sie be amu sala sasaisa mo le antulu kai mo.”
Eleki Abrahame ikotie loko Alla etesi hoko Abimeleke, eni bina kai bina rebe esi kerike eteije esi mise bei makerake eti esi supu ruele kwetele.
Le bei Abimeleke irana Abrahame eni bina Sarare, eti TUHANE Iono Abimeleke eni bina kai bina rebe esi kerike eteije esi ndote.